Nýr framkvæmdasjóður vegna jarðvarmaverkefna hefur verið settur á laggirnar á vegum Alþjóðabankans, en stofnfé hans er 500 milljónir Bandaríkjadollara. Sri Mulyani Indrawati, framkvæmdastjóri hjá Alþjóðabankanum, kynnti þetta á íslensku jarðvarmaráðstefnunni í Hörpu í dag.
Sagði hún að þetta myndi bæði hjálpa til við rannsóknir og leit að jarðhitalindum, sem og auðvelda stækkun á núverandi virkjunum. Sérstaklega er horft til framkvæmda á svæðum þar sem fjármagn vantar vegna framkvæmda af þessu tagi, en ekki er ólíklegt að þetta muni snerta íslensk verkfræði- og orkufyrirtæki sem í dag eru framarlega á sviði jarðvarmarannsókna og virkjana og eru með starfsemi víða um heim.