Eimskip vísar máli FME til dómstóla

Eimskip hefur ákveðið að vísa til dómstóla ákvörðun Fjármálaeftirlitsins um fimmtíu milljóna króna stjórnvaldssekt vegna meints brots fyrirtækisins á lögum um verðbréfaviðskipti. 

Fjármálaeftirlitið telur að Eimskip hafi brotið gegn 1. mgr. 122. gr. laga um verðbréfaviðskipti, í tengslum við birtingu árshlutareiknings fyrir fyrsta ársfjórðung 2016. Eftirlitið telur brot Eimskips felast í því að hafa ekki birt fyrr innherjaupplýsingar sem mynduðust að mati eftirlitsins um bætta rekstrarafkomu félagsins á fyrsta ársfjórðungi 2016 eða sent Fjármálaeftirlitinu tilkynningu um frestun birtingar.

Í tilkynningu til Kauphallar segir að Eimskip sé ósammála þeirri lögskýringu sem liggi til grundvallar niðurstöðu Fjármálaeftirlitsins. 

„Ef fallist verður á lögskýringu Fjármálaeftirlitsins mun hún leiða til þess í framkvæmd að skráðum félögum er í raun ómögulegt að standa eðlilega að vinnu við undirbúning fjárhagsuppgjöra, nema með því að taka ávallt upp það verklag að tilkynna eftirlitinu um frestun á birtingu upplýsinga um leið og undirbúningsvinna uppgjörs hefst. Vandséð er hins vegar hverju slík framkvæmd myndi þjóna og hvað þá fyrir fjárfesta sem eiga von á slíkri reglubundinni upplýsingagjöf af hálfu skráðra félaga á markaði,“ segir í tilkynningunni.

Að mati félagsins var öllum undirbúningi við gerð og birtingu uppgjörsins hagað í samræmi við lög og góða stjórnarhætti. Þess vegna hefur félagið ákveðið að vísa málinu til dómstóla.

• Blogga um frétt