„Þetta verður miklu meira en bara hamborgarastaður,“ segir Sindri Snær Jensson, annar eigenda verslunarinnar Húrra Reykjavík, sem opnar einmitt einn slíkan, hamborgarastað, á næstunni.
Staðurinn tilvonandi hefur fengið heitið Yuzu eftir gula ávextinum, sem lítur út eins og krumpuð sítróna og er fyrirferðarmikill í japanskri matargerð. Yuzu verður að finna í mörgum réttum á matseðli staðarins, sósum og fleira.
Sindri leggur áherslu á að stað staðurinn muni bjóða upp á fjölbreyttan matseðil. „Það verður eitthvað fyrir alla,“ segir hann, hvort heldur kjötætur, grænkera eða aðra. Hann segir þá félaga sækja fyrirmyndir hvaðanæva, bæði frá Evrópu og Asíu. Á staðnum verður til að mynda boðið upp á gufubökuð brauð, sem Sindri segir að séu ferskari en Íslendingar eigi að venjast.
Auk Sindra koma Jón Davíð Davíðsson, meðeigandi hans í Húrra, og Haukur Már Hauksson, kokkur og vinur þeirra stráka, að staðnum. Ástríða Hauks liggur í asískri matargerð og mun þeirra áhrifa vafalítið gæta á matseðlinum, segir Sindri. Haukur hefur komið víða við í eldhúsinu, var yfirkokkur á Grillmarkaðnum og starfaði á Zuma, einum flottasta veitingastað í heimi, í London.
Sindri og Jón eru heldur ekki ókunnir veitingabransanum því þeir eru báðir í eigendahópi pítsastaðarins Flateyjar, sem opnaði úti á Granda í Reykjavík fyrir tveim árum við góðar undirtektir.
Yuzu verður til húsa á Hverfisgötu 44, steinsnar frá strákaverslun Húrra í húsi númer 50, á Brynjureitnum svokallaða. Þeir félagar fengu lyklana að nýbyggingunni um síðustu mánaðamót og hafa unnið að uppbyggingu síðan. Rýmið, 200 fermetrar á jarðhæð, er skipulagt í samstarfi við Haf Studio og er ætlunin að það verði í „þokkalega hráum skandinavískum stíl“ en þó með japönsku ívafi í samræmi við matseðilinn.
Sindri segist raunsæis- og bjartsýnismaður, og því sé stefnt að opnun í september. „Við erum alveg ógeðslega spenntir fyrir því að sýna fólki þetta og teljum að við séum með talsvert öðruvísi konsept en fólk eigi að venjast,“ segir hann að lokum.