Afar lítið fékkst upp í rúmlega 268 milljóna króna kröfur í bú bókunarþjónustunnar Iceland Travel Assistance, en skiptum á búinu lauk í lok júnímánaðar. Fyrirtækið var tekið til gjaldþrotaskipta í mars í fyrra.
Greint er frá því í Lögbirtingablaðinu að einungis 961.816 kr. hafi fengist upp í lýstar kröfur, sem alls námu 268.355.118 kr.
Iceland Travel Assistance var með nokkrar starfsstöðvar á höfuðborgarsvæðinu og var milliliður í bókunum á ferðum hjá íslenskum ferðaþjónustufyrirtækjum.
Umfangsmesta starfsstöð fyrirtækisins var upplýsingamiðstöð ferðamanna í Aðalstræti, sem rekin var í samstarfi við Reykjavíkurborg. Þegar ákveðið var að færa upplýsingamiðstöðina í Ráðhús Reykjavíkur árið 2017 missti fyrirtækið samninginn til Guide to Iceland.
Guðmundur Ásgeirsson átti 100% hlut í Iceland Travel Assistance í gegnum einkahlutafélagið Hlér.
Ársreikningur fyrirtækisins fyrir árið 2016 sýndi að velta þess hefði numið 703 milljónum króna og var hagnaður ársins tæpar 74 milljónir. Kostnaður fyrirtækisins jókst hins vegar um 21% á milli áranna 2015 og 2016, eða úr 520 milljónum í 628 milljónir.