Gengi hlutabréfa Icelandair Group lækkaði um 8,33% í Kauphöll Íslands í dag. Stendur gengið nú í 2,2 kr. og hefur þrátt fyrir lækkun dagsins hækkað umtalsvert frá upphafi vikunnar þegar það stóð í 1,9 kr. Námu viðskipti með bréf flugfélagsins í dag ríflega 16 milljónum króna.
Hluthafafundur Icelandair var haldinn sl. föstudag þar sem samþykkt var að fara í hlutafjárútboð. Stefnir félagið á að safna 22-29 milljörðum króna í umræddu útboði, en félagið á líkt og önnur flugfélög í talsverðum erfiðleikum.
Í dag sendi ASÍ frá sér tilkynningu þar sem fram kom að allar vangaveltur í fjölmiðlum um hvernig koma megi Icelandair undan því að semja við Flugfreyjufélag Íslands (FFÍ) eigi sér litla stoð í raunveruleikanum.