Hagnaður fyrirtækjasamstæðu Lyfju nam 438 milljónum króna á síðasta ári. Tekjur samstæðunnar námu alls 12,2 milljörðum árið 2020 og jukust um 15% frá fyrra ári. Framlegð af vörusölu var 33% og hefur álagning Lyfju farið lækkandi undanfarin ár, bæði vegna verðsamkeppni á markaði en einnig vegna ákvarðana lyfjagreiðslunefndar. Þetta kemur fram í fréttatilkynningu.
„Lyfja rekur lyfjaverslanir, heilsuvöruverslanir undir merkjum Heilsuhússins og heildsölu sem sérhæfir sig í innflutningi á heilsuvörum. Alls starfa tæplega 350 starfsmenn hjá Lyfjusamstæðunni í um 240 stöðugildum, um þriðjungur starfsmanna Lyfju eru sérhæfðir heilbrigðisstarfsmenn og 83% starfsmanna eru konur. Lyfja var á meðal fyrstu fyrirtækja landsins til að hljóta jafnlaunavottun og var óútskýrður launamunur 0,0% hjá samstæðunni á árinu 2020.
Heimsfaraldurinn hafði mikil áhrif á rekstur Lyfju á árinu, áhersla var lögð á forvarnir, fræðslu, breytingu á vaktafyrirkomulagi, skipulagi í verslunum og þjónustu við viðskiptavini með það að marki að auka öryggi og draga úr áhættu. Á sama tíma urðu miklar breytingar á neysluhegðun og náði starfsfólk samstæðunnar að bregðast við öllum þeim breytingum og tryggja viðskiptavinum mikilvægar vörur í baráttu við veiruna. Beinn launakostnaður og starfsmanntengdur kostnaður vegna Covid-19 nam alls 50 milljónum króna á árinu,“ segir í tilkynningu.
„Lyfja lagði mikla áherslu á samfélag og sjálfbærni á árinu, hafa jákvæð áhrif á umhverfið og stuðla að heilbrigðu líferni og vellíðan frá vöggu til grafar. Til að leggja sitt af mörkum bjóðum við hjá Lyfju lágt lyfjaverð um allt land, leggjum áherslu á að kynna samheitalyf sem leið til að lækka lyfjakostnað og fræða almenning um samheitalyf. Þegar lyf eru keypt í Lyfju-appinu eru samheitalyf alltaf boðin og þeim er raðað þannig að ódýrasta lyfið birtist efst,“ segir Sigríður Margrét Oddsdóttir, framkvæmdastjóri Lyfju.