Í dag klukkan 12 lýkur hlutafjárútboði Íslandsbanka sem hófst á mánudaginn í síðustu viku.
Í gær kom fram í tilkynningu á vef bankans að líkur væru á því að lægri tilboð en 79 krónur á hvern hlut í útboðinu yrðu ekki samþykkt, en leiðbeinandi verð útboðshluta er á bilinu 71 til 79 krónur.
Miðað við 79 króna söluverð er markaðsverðmæti Íslandsbanka að loknu útboðinu 158 milljarðar króna.
Til sölu eru að lágmarki 25% af útgefnu og útistandandi hlutafé bankans en heimilt verður, sem hluti af útboðinu, að stækka útboðið í allt að 35% af útgefnu útistandandi hlutafé bankans. Það myndi skila ríkinu rúmlega 55 milljörðum króna. Að kvöldi fyrsta dags útboðsins tilkynnti bankinn að þá þegar hefðu borist áskriftir fyrir meira en 35% hlut í bankanum.
Stefnt er að því að taka hlutabréf í Íslandsbanka til viðskipta í kauphöllinni eftir að útboðinu lýkur. Bankinn mun þá verða þriðja stærsta félagið í Kauphöllinni á eftir Marel og Arion banka.