Jakob Valgeir kaupir 20% hlut í Gunnvöru

Hraðfrystihúsið-Gunnvör er á fjörukambinum í Hnífsdal.
Hraðfrystihúsið-Gunnvör er á fjörukambinum í Hnífsdal. mbl.is/Halldór Sveinbjörnsson

Eigendur 19,64% hlutar í Hraðfrystihúsinu Gunnvöru í Hnífsdal hafa selt hlut sinn í félaginu. Kaupandi er Jakob Valgeir ehf., sem rekur hundrað manna útgerðar- og fiskvinnslufyrirtæki í Bolungarvík. Söluverð hlutarins er trúnaðarmál að því er fram kemur í tilkynningu frá Jakobi Valgeir.

Hraðfrystihúsið Gunnvör rekur frystitogara, ísfiskskip, innfjarðarrækjubáta, fiskvinnslu í landi og fiskeldisstarfsemi gegnum dótturfélag. Um 130 manns starfa hjá fyrirtækinu.   

Seljendur hlutarins eru systkinin Guðmundur, Kristinn Þórir, Ólöf Jóna og Steinar Örn Kristjánsbörn. Hluturinn hefur verið í eigu fjölskyldunnar í áratugi.

„Það skiptir okkur miklu máli að reksturinn í Hnífsdal sé traustur og fyrirtækið verði áfram hornsteinn í atvinnulífinu á staðnum. Við þekkjum Jakob Valgeir af góðu einu, vitum að hann hefur sterkar taugar til svæðisins og skilur tækifærin sem felast í rekstri félagsins í Hnífsdal," segir Kristinn, talsmaður seljendanna, í tilkynningunni.

Jakob Valgeir Flosason
Jakob Valgeir Flosason

„Það er spennandi verkefni að fylgja þessu sögufræga fyrirtæki inn í framtíðina. Reksturinn hefur gengið vel og ég hlakka til að leggja mitt af mörkum, svo félagið haldi áfram að vaxa og dafna ásamt samfélaginu sem það starfar í. Ég hef mikla trú á þessari fjárfestingu og framtíð félagsins," segir Jakob Valgeir Flosason, framkvæmdastjóri Jaboks Valgeirs ehf.

mbl.is
  ISK
  USD
  EUR
  GBP
  CAD
  DKK
  NOK
  SEK
  ISK
  USD
  EUR
  GBP
  CAD
  DKK
  NOK
  SEK