„Við erum ekki að krefjast þess að íslensk stjórnvöld víki frá þeirri stefnu að styðja bandamenn okkar. Rússar hafa sett á okkur innflutningsbann og því verður ekki aflétt nema með samtali við rússnesk stjórnvöld. Það þarf að marka einhverja stefnu í því hvernig eigi að þoka þeim málum áfram,“ segir Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, í samtali við 200 mílur.
Hún tekur þó fram að fullt tilefni sé til að endurskoða með reglulegu millibili hvort ástæða sé til að halda viðskiptaþvingununum til streitu.
Á vef Ríkisútvarpsins er haft eftir Þorgerði Katrínu Gunnarsdóttur sjávarútvegsráðherra að íslensk stjórnvöld ætli ekki að breyta utanríkisstefnu sinni og muni áfram taka þátt í viðskiptaþvingunum gagnvart Rússum. Rússar ákváðu á móti að banna innflutning tiltekinna matvæla, m.a. íslenskra sjávarafurða, og segir Heiðrún Lind bannið koma verst niður á Íslandi hlutfallslega af öllum ríkjum.
„Við erum ekki að gera kröfu um stefnubreytingu,“ segir Heiðrún Lind um þátttöku íslenskra stjórnvalda í viðskiptaþvingununum gagnvart Rússum, heldur vilja samtökin að opnað verði á samtal við rússnesk stjórnvöld um innflutning á íslenskum sjávarafurðum.
Norsk stjórnvöld hafa átt í slíku samtali við Rússa og segir Heiðrún farið að hilla undir hugsanlega lendingu milli ríkjanna tveggja. Er það meðal annars komið til vegna þrýstings rússneskra verslunarmanna sem eru þreyttir á háu fiskverði Færeyinga sem sitja nú einir að markaðinum.
„Næstu skref eru stjórnvalda, að opna á þetta samtal. Við þurfum að setja okkur markmið um að þoka þessum málum áfram, við getum ekki búið við þetta til lengri tíma,“ segir Heiðrún Lind og bætir við að Rússland sé einn af stærstu mörkuðum íslenskra sjávarafurða. Hluti þess sem áður fór inn á þann markað fer nú á aðra markaði, en á lægra verði en áður og einnig í minna magni.