Streyma inn tilkynningar um borgarísjaka

Hafísinn virðist býsna langt undan, ef marka má nýlegar myndir frá dönsku veðurstofunni. Samkvæmt þeim er ísbreiðan óvenju langt norður í hafi, en samanburður við kort frá því í ágústbyrjun og miðjan október í fyrra sýnir að ísinn er talsvert norðar en þá.

Þetta kemur fram í tilkynningu frá Landhelgisgæslunni, en um þessar mundir er ísbreiðan jafnan með minnsta móti enda heitustu mánuðir ársins nýlega að baki.

„Á sama tíma og ísbreiðan er svo langt norður í hafi streyma inn tilkynningar frá íslenskum skipum til stjórnstöðvar Landhelgisgæslunnar um borgarísjaka á miðunum norðvestur og norður af Vestfjörðum og jafnvel langt inn á Húnaflóa,“ segir í tilkynningu Gæslunnar.

Varðskipið Týr mun þannig hafa siglt fram hjá borgarísjökum á þessum slóðum í eftirlitsferð undir lok síðasta mánaðar. Var einn þeirra um tuttugu metra hár og sjötíu metra breiður.

„Smærri jakar voru í grenndinni. Tilkynningar um borgarísjaka hafa einnig borist frá áhöfnum flugvéla á ferð um þessar slóðir.“

• Blogga um frétt