Rannsökuðu kóralsvæði við Ísland

Finna má kaldsjávarkóralsvæði á landgrunnskantinum fyrir sunnan land, og finnast kóralar helst á hryggjum sem ganga þvert á Lónsdjúp, sem staðsett er á kantinum suðaustur af Íslandi. Algengasta tegundin sem veiðist þar er keila, en tvöfalt meira er af henni á hryggjunum en utan þeirra.

Þetta er meðal þess sem fram kemur í grein sem starfsmenn Hafrannsóknastofnunar, þeir Stefán Áki Ragnarsson og Julian Mariano Burgos, birtu nýverið í vísindaritinu Marine Environmental Research. Greint er frá þessu á vef stofnunarinnar og segir þar að rannsóknin hafi beinst að tengslum fiska og kóralsvæða.

Hryggirnir ganga þvert á Lónsdjúp, suðaustur af Íslandi. Kort/mbl.is

Fiskisamfélögin frábrugðin á hryggjunum

„Á árunum 2009 og 2010 fóru fram tveir leiðangrar þar sem samsetning og þéttleiki fiska sem veiddust á línu á hryggjunum innan Lónsdjúps sem og utan þeirra var könnuð. Algengasta tegundin sem veiddist var keila, og var afli hennar tvöfalt meiri á hryggjunum en utan þeirra,“ segir í samantektinni.

Gerð fiskisamfélaga á hryggjunum hafi þá verið frábrugðin því sem var að finna utan þeirra.

„Þeir þættir sem útskýrðu þennan mun þegar unnið var úr gögnunum með margþáttagreiningu, var botnlag, staðsetning innan rannsóknarsvæðis, sem og magn kórals. Fæða keilu sem veiddist á hryggjunum samanstóð m. af fiski og margvíslegum kröbbum meðan að humar var ríkjandi utan þeirra. Á línuna veiddust margvíslegir kaldsjávarkóralar sem og ýmsar aðar viðkvæmar tegundir botndýra.“

• Blogga um frétt