Aflinn á heimamiðum að glæðast

„Við vorum að veiðum í Síldarsmugunni í þessum túr og það var dálítið snúið að finna fiskinn. Það var mikil ferð á honum og langt á milli veiðisvæða. Nýjustu fréttir benda hins vegar til að aflinn á heimamiðum sé að glæðast og nú eru skip að veiðum í Víkurálnum fyrir vestan land og svo á Hvalbakshallinu fyrir austan.“

Þetta segir Theódór Þórðarson, skipstjóri á Venusi NS, sem kom til heimahafnar á Vopnafirði í gærkvöldi með um 960 tonn af makríl til vinnslu, að því er fram kemur á vef HB Granda.

Fram kemur einnig að Víkingur AK sé nú að veiðum í Reyðarfjarðardjúpi eftir að hafa komið til Vopnafjarðar með 880 tonna makrílfarm. Hjalti Einarsson skipstjóri segir að Víkingur hafi verið kominn á veiðisvæðið í gærmorgun en Hoffell SU svo einnig komið á miðin.

„Við erum bara búnir að taka eitt níutíu tonna hol þannig að það er of snemmt að segja til um ástandið. Makríllinn er að minnsta kosti stór og feitur,“ segir Hjalti.

„Annars skilst mér að það sé nokkuð líflegt hjá skipunum fyrir vestan. Þar, eins og annars staðar, er mikil ferð á makrílnum. Eina stundina er allt vaðandi en svo hverfur makríllinn þess á milli.“

• Blogga um frétt