Hörkubræla en góð síldveiði

„Það er búin að vera mjög góð síldveiði frá því að veiðarnar hófust. Það er mikið að sjá og það virðist vera mikið af síld á ferðinni,“ segir Theódór Þórðarson, skipstjóri á Venusi NS.

Að sögn Theódórs var leiðinlegt veður þá þrjá daga sem skipið var á veiðum. Stöðug kvika og þegar verst lét hörkubræla.

Að hans sögn er síldin stór og falleg, 380 til 400 grömm að þyngd, og aukaafli enginn. 

„Við tókum fimm hol og aflinn er rúmlega 1.000 tonn. Síldin hagar sér þannig að hún dýpkar á sér yfir daginn. Fer jafnvel niður fyrir 200 faðma. Svo þegar aðeins fer að skyggja kemur hún upp, allt upp á 30 metra dýpi, og þá er þægilegast fyrir okkur að eiga við hana,“ er haft eftir Theódóri á vef HB Granda, en tal náðist af honum um miðjan dag í gær, er ferðin til heimahafnar á Vopnafirði var nýhafin. Venus kom svo þar til hafnar í morgun.

• Blogga um frétt