Loðnubrestur muni hafa mikil áhrif

Bæjarráð Fjarðabyggðar hefur falið fjármálastjóra sveitarfélagsins að fara yfir fjárhagsleg áhrif loðnubrests á tekjur aðalsjóðs og hafnarsjóðs og leggja fyrir bæjarráð. Þetta var niðurstaða fundar ráðsins sem kom saman í morgun.

Frétt af mbl.is

Loðnuleit lokið og enginn kvóti

Í fundargerð ráðsins segir að ljóst sé að ef loðna finnist ekki í nægjanlegu magni á Íslandsmiðum á yfirstandandi vertíð verði áhrifin mikil á mörg sveitarfélög, þar sem uppsjávarvinnsla sé mikilvægur þáttur í sjávarútvegi þeirra.

„Óvíða er uppsjávarvinnsla meiri en í Fjarðabyggð og ljóst er að loðnubrestur mun hafa mikil áhrif á fjárhag sveitarfélagsins. Þá er einnig mikið áhyggjuefni að ekki er búið að ljúka samningum um kolmunnaveiðar í færeyskri lögsögu, sem ekki síður hefur mikil áhrif á sjávarútvegsfyrirtækin í Fjarðabyggð,“ segir í fundargerðinni.

Hvetur bæjarráð þá stjórnvöld til að fara vel yfir stöðu þessara mála, enda sé það mikið hagsmunamál fyrir sveitarfélög, fyrirtæki og ríki, þar sem um sé að ræða verulegan hluta útflutningsverðmæta sjávarútvegs á Íslandi.

• Blogga um frétt