Viðlega smábáta flyst í Vesturbugtina

Viðlega smábáta í útgerð frá Reykjavík verður færð yfir í Vesturbugt og verður hafist handa við nauðsynlegar breytingar næsta haust eða vetur, samkvæmt upplýsingum Gísla Gíslasonar, hafnarstjóra.

Á fundi stjórnar Faxaflóahafna á föstudag var hafnarstjóra falið að ræða við fulltrúa smábátaeigenda um aðgerðir til að efla útgerð smábáta frá Reykjavík og Akranesi. Á síðasta ári var aðeins um 500 tonnum landað úr smábátum í Reykjavík, en nálægt þúsund tonnum á Akranesi.

Nú hafa bátar í útgerð einkum aðstöðu í Suðurbugt, Norðurbugt og á Verbúðarbryggju í Reykjavík og þá einkum við bryggju næst Ægisgarði í Suðurbugt. Fyrirhugað er að færa bryggjuna úr Suðurbugt í Vesturbugt á milli Slippsins og Sjóminjasafnsins, en samhliða þarf að ráðast í ýmsar aðrar framkvæmdir. Gísli segir að fyrirhugaðar byggingaframkvæmdir í Vesturbugtinni eigi ekki að trufla útgerðina ef vel verði að málum staðið.

Nýliðun sífellt erfiðari

Lítil þátttaka var í þjónustukönnun Faxaflóahafna varðandi aðstöðu smábátaútgerða,sem kynnt var á föstudag. Alls tók 21 smábátaeigandi í Reykjavík og á Akranesi þátt, en spurningalistinn var sendur á 53 smábátaeigendur. Rúmlega 61% svarenda í Reykjavík var jákvætt gagnvart flutningi aðstöðunnar í Vesturbugt.

Í niðurstöðum segir meðal annars: „Útgerð smábáta hefur átt undir högg að sækja síðustu ár þar sem nýliðun í þessari útgerð verður sífellt erfiðari. Endurnýjun innan stéttarinnar virðist hæg og því vert að halda utan um þessa útgerð með alúð þar sem um langa atvinnuhefð og menningu er að ræða.“ Gísli hafnarstjóri hyggst ræða við forsvarsmenn smábátaeigenda fljótlega og heyra skoðanir þeirra á því hvað sé til ráða í því skyni að sporna við frekari fækkun.

Ítarlegri umfjöllun er að finna í Morgunblaðinu sem út kom í gær, þriðjudag.