Verðmæti útfluttra sjávaafurða jókst

Verðmæti útfluttra sjávarafurða var 21,7% meira á síðasta ári en árið á undan samkvæmt nýjum tölum frá Hagstofu Íslands. Þannig var útflutningsverðmæti sjávarafurða árið 2018 239,8 milljarðar króna en flutt voru út rúmlega 670 þúsund tonn af sjávarafurðum á síðasta ári sem er 61 þúsund tonni meira en árið áður.

Fram kemur í fréttatilkynningu að frystar sjávarafurðir hafi verið 46,7% af útflutningsverðmætinu, ísaðar afurðir 24,9% og mjöl/lýsi 14,3%. Af einstökum tegundum hafi verðmæti ísaðra þorskafurða verið mest eða tæpir 39,4 milljarðar króna og næst verðmæti frysts þorsks um 35,3 milljarðar króna. Mest útflutningsverðmæti hafi fengist vegna sölu til Bretlands eða 15,3% af heildarútflutningsverðmætinu og næst mest til Frakklands 11,3%. Þar á eftir komu Spánn, Noregur og Bandaríkin með rétt undir 10% hvert sem er hliðstætt við árið 2017.

Verðmæti útflutningsframleiðslu sjávarafurða, samtala útflutnings og birgðabreytinga sjávarafurða, var tæplega 240 milljarðar árið 2018 sem er 22% aukning frá fyrra ári segir ennfremur. Útflutningsframleiðsla á föstu verðlagi jókst um 24% miðað við árið 2017.

• 1 blogg um fréttina

Bloggað um fréttina

• Ómar Ragnarsson: Þorskurinn reynist dýrmætur.