Skoða sameiningu sjávarútvegsfyrirtækja í Grindavík

Eigendur sjávarútvegsfyrirtækjanna Vísis hf. og Þorbjarnar hf. frá Grindavík  hafa hafið viðræður um að stofna nýtt fyrirtæki og byggja upp rekstur nýs sjávarútvegsfyrirtækis í Grindavík. Yrðu eignir félaganna lagðar inn í nýja félagið. Þetta kemur fram í sameiginlegri tilkynningu.

Fram kemur að félögin séu svipuð að stærð og hafi unnið talsvert saman. Þannig eiga þau meðal annars saman félög á borð við Haustak, Codland og sölufyrirtæki á Grikklandi.

Ef af verður verður nýtt félag með rúmlega 44.000 tonn af aflaheimildum, um það bil 16 milljarða króna veltu og vel yfir 600 manns í vinnu.

Fram kemur að núverandi eigendur félaganna verði áfram allir hluthafar í nýju félagi, en markmið þeirra sé að búa til nýtt og kröftugt fyrirtæki sem jafnframt getur fylgt eftir tækninýjungum og svarað aukinni kröfu markaðanna. Einnig mun hið nýja fyrirtæki tryggja bolfiskvinnslu og styrkja samfélagið í Grindavík enn frekar.

Áætlað er að samruni af þessu tagi taki allt að 3 árum og er ekki reiknað með uppsögnum í tengslum við hann, þó má að sjálfsögðu gera ráð fyrir breytingum á útgerðarháttum og mögulega einhverjum tilfærslum á störfum á þeim tíma.

Gangi viðræður um stofnun nýs félags samkvæmt áætlun, má búast við að það taki til starfa um áramót, en þangað til verður rekstur fyrirtækjanna tveggja óbreyttur.

Pétur Hafsteinn Pálsson, framkvæmdastjóri Vísis og Gunnar Tómasson, framkvæmdastjóri Þorbjarnar.

• Blogga um frétt