Hildur ráðin til SFS

Hildur Hauksdóttir, sérfræðingur í umhverfismálum, hefur verið ráðin til Samtaka fyrirtækja í sjávarútvegi, að því er fram kemur í tilkynningu frá SFS. Þar segir jafnframt að „verkefni tengd umhverfismálum í víðu samhengi eru sífellt að verða fyrirferðarmeiri í störfum SFS. Þörf er á stefnumörkun samtakanna í umhverfismálum og frumkvæði í samtali við bæði félagsmenn, stjórnvöld og samfélagið.“

Hildur er sögð þekkja vel til sjávarútvegs og umhverfismála, en hún hefur undanfarin þrjú ár unnið að umhverfis- og markaðstengdum verkefnum hjá Brimi (áður HB Granda) og stjórnaði meðal annars vinnu við gerð samfélagsskýrslu félagsins.

Hún er með BSc-gráðu í rekstrarverkfræði frá Háskólanum í Reykjavík og MBA-gráðu með sérhæfingu í umhverfis- og samfélagsábyrgð frá Griffith University í Brisbane í Ástralíu.

• Blogga um frétt