Ígulker ekki í nýtanlegu magni í Ísafjarðardjúpi

Engin nýtanleg ígulkeramið fundust á þeim tíu svæðum sem skoðuð voru með ígulkeraplóg í Ísafjarðardjúpi, að því er fram kemur á vef Hafrannsóknastofnunar.

Einnig voru skoðuð tíu svæði í Húnaflóa þar sem ígulker fundust víða. Þá segir að á því svæði sem þéttleiki ígulkera var mestur voru þau yfirleitt smá og undir löndunarstærð, auk þess var mikið af kóralþörungi á svæðinu.

Frétt af mbl.is

Banna veiðar á ígulkerum í Breiðafirði

Á þeim svæðum sem ígulker voru að finna „í veiðanlegu magni var minna magn kóralþörunga, en þeir greindust á 4 af þeim 10 stöðvum sem voru skoðaðar. Greinóttir kóralþörungar mynda afar viðkvæm og fjölbreytileg búsvæði með hátt verndargildi. Þau eru talin mikilvæg fyrir ungviði nytjastofna og ætti því ekki að stunda plógveiðar á þeim,“ segir á vef stofnunarinnar.

Hafrannsóknastofnun hefur birt skýrslur með niðurstöðum úr Ísafjarðardjúpi og Húnaflóa. Fram kemur að Þórishólmi ehf. hafi staðið fyrir leiðöngrunum en um borð hafi verið eftirlitsmaður frá Fiskistofu sem sá um skráningu á afla og myndatöku. Tíu stöðvar voru skoðaðar á hverju svæði.

• Blogga um frétt