Sigldu heim í 10 til 12 metra ölduhæð

Smáey VE kom til hafnar í Vestmannaeyjum í morgun með fullfermi og kvaðst Egill Guðni Guðnason, skipstjóri, ánægður með aflann.

„Þetta er þokkalegasti afli sem fékkst í vitlausu veðri í Skeiðarárdýpinu. Janúar er búinn að vera skelfilegur veðurfarslega. Það var vitlaust veður allan túrinn að undanskildum 12 klukkutímum. Ölduhæðin í gær var 10 til 12 metrar og við vorum tvöfalt lengur að sigla heim en eðlilegt má teljast,“ er haft eftir skipstjórann á vef Síldarvinnslunnar.

„Við vorum í Skeiðarárdýpinu allan tímann. Það var ekkert veður til að færa sig neitt. Aflinn er blandaður en mest af ýsu, karfa og lýsu,“bæti Egill Guðni við.

Bergey kom til hafnar í Vestmennaeyjum á laugardag.

Í kjölfar þess að ný Bergey VE kom til heimahafnar í Vestmannaeyjum á laugardag var ákveðið að halda til veiða í tilraunaskyni á meðan veður leyfði. Farið var úr höfn aðfararnót mánudags og er skipið komið til hafnar á ný og er unnið að því að stilla búnaðinn um borð.

• Blogga um frétt