Árnar of langt frá laxeldinu
Setja bókamerki
Hæstiréttur hefur staðfest frávísun héraðsdóms á máli sem málsóknarfélagið Náttúruvernd 2 höfðaði á hendur Matvælastofnun og Löxum fiskeldi ehf. til ógildingar á rekstrarleyfi sem Fiskistofa hafði veitt fyrirtækinu til reksturs sjókvíaeldis á laxi í Reyðarfirði.
Að málsóknarfélaginu stóðu Veiðifélag Hofsár og Sunnudalsár, Veiðifélag Selár, Veiðifélag Breiðdæla og Veiðifélag Vesturdalsár.
Í dómi réttarins kemur fram að í ljósi markmiða laga um lax- og silungsveiði, og að því gættu að veiðiréttarhöfum væri skylt að hafa með sér félagsskap í því skyni að markmiðunum yrði náð, yrði að leggja til grundvallar að veiðifélög gætu í skjóli umboðs sótt fyrir dómstólum kröfur sem lytu að veiðirétti félagsmanna sinna og þeir hefðu lögvarða hagsmuni af að fá úrlausn dómstóla um.
Ekki aðilar að stjórnsýslumáli um útgáfu leyfisins
Í dóminum var hins vegar vísað til þess að hvorki félagsmenn í veiðifélögunum né félögin sem slík hefðu átt aðild að stjórnsýslumáli um útgáfu umrædds rekstrarleyfis. Réttur málsóknarfélagsins til að bera undir dómstóla hvort farið hefði verið að lögum við útgáfu rekstrarleyfisins yrði því ekki reistur á aðild þeirra að stjórnsýslumálinu.
Þá taldi rétturinn að félagið gæti ekki reist heimild sína til höfðunar máls til ógildingar á umræddu starfsleyfi á reglum grenndarréttar, sökum þess hversu langt þær laxveiðiár sem um ræddi í málinu væru frá sjókvíaeldinu í Reyðarfirði.
Loks kom fram að til þess að fullnægt væri skilyrðum um lögvarða hagsmuni, samkvæmt lögum um meðferð einkamála, yrði málsóknarfélagið að sýna fram á eða gera líklegt að félagsmenn þess hefðu orðið fyrir tjóni vegna umræddrar starfsemi. Það hefði félagið ekki gert.
Skiptir miklu meira máli en fólk grunar
Tveir í bílnum sem lenti utan vegar
Handteknir eftir myndatöku í Vesturbæjarlaug
„Það þarf að vinna mikinn fjölda upp“
Skar höfuðleðrið af íslenskri konu
Eyjafjarðarbraut lokað vegna alvarlegs umferðarslyss
Krefjast stöðvunar framkvæmda