Héraðsdómur Reykjaness hefur sýknað fyrirtækið Laxa fiskeldi ehf. og Matvælastofnun af kröfum Náttúrverndar 2, málsóknarfélags um að ógilda rekstrarleyfi sem Fiskistofa veitti Löxum fiskeldi ehf. 15. mars 2012 til reksturs stöðvar til sjókvíaeldis á laxi í Reyðarfirði.

Stefnandi höfðaði málið 4. apríl 2017, rúmum fimm árum eftir að framangreint rekstrarleyfi var gefið út. Telur hann að hlunnindi þeirra veiðifélaga sem eiga aðild að stefnanda muni skerðast ef laxeldið nær fram að ganga, en félögin fara með veiðirétt landeigenda við tilteknar ár á Austfjörðum. Vísar stefnandi í þessu sambandi til hættu sem fylgi slysasleppingum og erfðablöndun laxa, að því er segir í dóminum.

Laxar fiskeldi ehf. byggði sýknukröfu sína á því að engir form- eða efnisannmarkar hafi verið á veitingu rekstrarleyfis stefnda þannig að varði ógildingu þess. Leyfið hafi ekki runnið út, málsmeðferðar­reglum hafi verið fylgt í hvívetna og að fullar efnislegar forsendur hafi verið til veitingar leyfisins.

Matvælastofnun taldi að hún skyldi sýknuð á grundvelli aðildarskorts stefnanda samkvæmt 2. mgr. 16. gr. laga nr. 91/1991 um meðferð einkamála enda geti stefnandi ekki talist eiga aðild að máli um ógildingu rekstrarleyfis til handa þriðja aðila, samkvæmt dóminum. Þá byggði Matvælastofnun á því að ákvörðun um umrætt rekstrarleyfi uppfylli form- og efnisskilyrði laga.

Tengdar fréttir

Fiskeldi

Akureyringar taka ekki afstöðu

• Lagareldisfrumvarpið ekki lagt fram
• Þróa aðferð til framleiðslu á geldlaxi
• Stórfellt laxeldi áformað
• Stýrir sölu- og markaðsmálum First Water

» Fleiri tengdar fréttir

• Blogga um frétt