Þorlákur úr formannsstól eftir eitt ár í embætti
Setja bókamerki
Tengdar fréttir
Smábátaveiðar
Fyrri hluti aðalfundar Landssambands smábátaeigenda var haldinn í gær. Um óhefðbundinn fund með fjarfundabúnaði var að ræða og aðeins hluti hefðbundinna aðalfundarstarfa á dagskrá. Fundinum verður lokið þegar aðstæður leyfa.
Þorlákur Halldórsson, formaður sambandsins, sagði meðal annars í ræðu sinni að mikil hætta steðji að fiskveiðum þar sem hætta er á að sjávarspendýr verði meðafli. Benti hann á að Bandaríkin hyggjast banna innflutning fiskafurða frá 1. janúar 2022 frá ríkjum þar sem slíkar veiðar eru stundaðar, en hámarksfjöldi sela sem leyfilegur meðafli hér við Íslandi eru 40 dýr.
Vegna þessa eru grásleppuveiðar og aðrar netaveiðar í uppnámi, að mati Þorláks sem telur einu leiðina framhjá banninu vera að gera netaveiðar óheimilar.
Tveir frambjóðendur
Tveir hafa boðið sig fram til formanns, en Þorlákur hefur ákveðið að láta af störfum eftir eitt ár á formannsstóli.
Arthur Bogason, sem var formaður LS í tæplega 30 ár til 2013 og er heiðursfélagi sambandsins, gefur kost á sér nýjan leik. Einnig býður Gunnar Ingiberg Guðmundsson sig fram. Hann á og rekur bát í strandveiðikerfinu og stundar nám við tölvunarfræðideild HR. Hann var í öðru sæti á lista Pírata í kosningunum 2016 og sat um tíma sem varamaður á Alþingi veturinn 2016 til 2017.
Gagnrýndi stjórnvöld
Í skýrslu sinni gagnrýndi Örn Pálsson, framkvæmdastjóri Landssambandsins, sjávarútvegsráðherra, fyrir viðbrögð hans í upphafi kórónuveirufaraldursins. Óskað var eftir aukningu geymsluheimilda milli fiskveiðiára og að 12 daga til strandveiða í hverjum mánuði væri hægt að yfirfæra milli mánaða. „Viðbrögð sjávarútvegsráðherra við umleitunum LS gáfu til kynna að hann væri ekki í startholum Usains Bolts til að hlaupa með keflið inn á ríkisstjórnarfund til að fá heimild til lagabreytinga eða hann sjálfur að munda pennann til breytinga á reglugerðum. Aldeilis ekki.“
/frimg/1/22/8/1220844.jpg)
Örn gagnrýndi stöðvun grásleppuveiða síðasta vor áður en hluti leyfishafa hafði byrjað veiðar. Hann sagði að Landssambandið hefði fengið álitsgerð lögmanns um málið. Þá sagði Örn að hrun hefði orðið á verði á frosinni grásleppu.
Frumvarp um kvótasetningu grásleppu kallaði Örn „annað ófriðarbál í boði sjávarútvegsráðherra“. Hann sagði það verða verkefni síðari hluta aðalfundar LS að finna farsælustu niðurstöðuna í þessu erfiða máli.
Óvenjuleg tilkynning: 19 í gæsluvarðhaldi
Vangaveltur gengu lengra en innistæða var fyrir
Komu saman á kyrrðar- og bænastund
Gerðu umfangsmiklar loftárásir á Líbanon
Davíð Viðarsson var skyndihugdetta
Grænlendingar vildu ekki fá björninn til baka
Birtu ekki dóm yfir fyrrverandi forseta bæjarstjórnar