Blængur til hafnar með 180 milljóna afla

Blængur NK, frystitogari Síldarvinnslunnar, kom í gær til hafnar í Neskaupstað eftir þriggja vikna túr með 570 tonna afla og nam verðmæti hans um 180 milljónum króna. Togarinn heldur til veiða á ný á fimmtudag en þá er stefnan sett á Barentshaf þar sem gert er ráð fyrir að veiða um 600 til 700 tonn, að því er fram kemur á vef útgerðarinnar.

Nýafstaðni túrinn gekk vel að sögn Bjarna Ólafs Hjálmarssonar, skipstjóra á Blængi. „Við veiddum víða. Við vorum hér fyrir austan land, úti fyrir Norðurlandi, vestur í Víkurál og reyndar einnig á Skerjadýpinu. Mest vorum við fyrir vestan. Aflinn er blandaður en þó mest af karfa. Segja má að túrinn hafi gengið vel og veðurfarið hefur verið einstakt. Það sem einkenndi túrinn var sannkölluð sumarblíða. Ufsaleysi skyggði þó á. Við leituðum sífellt að ufsa án árangurs. Það virðist bara enginn ufsi vera á ferðinni nú um stundir,“ segir Bjarni Ólafur.

• Blogga um frétt