Lægra verð fyrir fiskimjöl án vottana

Afturköllun á vottunum á kolmunna mun leiða til lægra verðs á mjöli og lýsi úr kolmunna og getur hugsanlega haft sölutregðu í för með sér, að mati Jóns Más Jónssonar, formanns Félags íslenskra fiskimjölsframleiðenda.

Vottun frá MSC og Marine Trust á kolmunna féll niður um áramót. Ekkert hefur verið selt af afurðum sem framleiddar eru eftir þann tíma, en Jón Már reiknar með að fyrstu áhrif af þessum breytingum komi í ljós á næstu vikum.

Frétt af mbl.is

Vottun á síld og kolmunna afturkölluð

Mest af kolmunnamjöli er nýtt í fóður fyrir eldislax og mikið af því er selt til Noregs, Danmerkur og Skotlands. Ferli við laxeldi í þessum löndum er að stórum hluta vottað og því eru gerðar kröfur um að afurðir sem eru nýttar í eldinu séu einnig vottaðar, að sögn Jóns Más. Þá hafi viðhorf neytenda breyst og á betur borgandi mörkuðum, t.d. í Vestur-Evrópu, hafi kröfur þeirra aukist.

Á síðasta ári veiddu Íslendingar rúm 244 þúsund tonn af kolmunna og auk þess lönduðu erlend skip rúmlega 10 þúsund tonnum. Úr þessu hráefni gætu hafa fengist rúm 50 þúsund tonn af mjöli og 4-5 þúsund tonn af lýsi. Hátt verð hefur verið fyrir þessar afurðir síðustu misseri og áætlar Jón Már að útflutningsverðmæti mjöls og lýsis af kolmunna á síðasta ári hafi verið um 12 milljarðar króna.

Ábyrgð og sjálfbærni

Meginástæða þess að kolmunni og norsk-íslensk síld misstu MSC-vottun um síðustu áramót er að kröfur um úrbætur hafa ekki verið uppfylltar þar sem veiðar hafa verið umfram ráðgjöf Alþjóðahafrannsóknaráðsins, ICES. Í byrjun árs 2019 missti makríll þessa vottun, en ekki eru í gildi heildarsamningar um stjórnun veiða á deilistofnum í NA-Atlantshafi.

Í samtali við Morgunblaðið í október sagði Gísli Gíslason, svæðisstjóri Marine Stewardship Council (MSC) fyrir Ísland, Færeyjar og Grænland, að kröfur frá neytendum hefðu síðustu ár gert vottun nauðsynlegri en áður og stórmarkaðir gerðu margir auknar kröfur um vottun. Umhverfisvitund almennings hefði vaxið og kröfur aukist um ábyrgð og sjálfbærni.