Sigurey ST aflamest meðal grásleppubáta
Setja bókamerki
Grásleppuvertíðin virðist hafa gengið vel til þessa og hefur, samkvæmt upplýsingum Fiskistofu, 1.581 tonni af grásleppu verið landað og eru níu bátar komnir með yfir 30 tonna afla.
Aðeins þrír bátar eru með yfir 40 tonn og er það Sigurey ST-22 sem gerð er út frá Drangsnesi sem er aflamesti báturinn til þessa með 42,1 tonn, þétt á eftir fylgir Arnþór EA-37 sem hefur landað 42 tonnum og Helga Sæm ÞH-70 sem hefur landað 40,3 tonnum.
Í fjórða sæti er Hlökk ST-66 með 36 tonn og Kristleifur ST-82 í fimmta með 34,6 tonn. Blíðfari ÓF-70 fylgir þar á eftir með 32,9 tonn, svo Fengur ÞH-207 með 32,8 tonn, Ísak AK-67 með 32 tonn og níundi báturinn með yfir 30 tonna grásleppuafla er Norðurljós NS-40 með 30,7 tonn.
Alls eru 105 bátar búnir að hefja veiðar og er talið að þeim muni fjölga, að því er fram kemur á vef Landssambands smábátaeigenda (LS). Er vísað til þess að á vertíðinni í fyrra hafi verið 201 bátur á veiðum, en það voru um 50 færri bátar en á meðalári. Ástæða þessa miklu fækkunar í fyrra er sögð vera að „um mánaðamótin apríl/maí var leyfilegum heildarafla náð og veiðar því stöðvaðar“.
Ekki markaður fyrir afla
Á grásleppuvertíðinni sem nú stendur yfir eru veiðidagarnir 40 og á heildarafli ekki að vera umfram 9.040 tonn samkvæmt ráðgjöf Hafrannsóknastofnunar sem ætti að vera vegleg vertíð, en meðaltal ráðgjafar stofnunarinnar á átta ára tímabili [2013-2020] er 5.386 tonn.
„Það þarf því ekki að koma neinum á óvart að markaðurinn hiksti við slíkum tíðindum og ekki hefur Covid-19 haft áhrif til góðs. Kaupendur tilkynntu um eitt hundrað króna verðlækkun á hvert kíló og greiða nú 130 kr./kg fyrir óskorna grásleppu. Ekki liggur fyrir hversu mikið magn verður hægt að selja á því verði. Að óbreyttu er ekki markaður fyrir þann heildarafla sem nú er leyfilegt að veiða,“ segir á vef LS.
Vangaveltur gengu lengra en innistæða var fyrir
Maðurinn sem leitað var að fannst látinn
Komu saman á kyrrðar- og bænastund
Grænlendingar vildu ekki fá björninn til baka
Óánægja er með áform um efnistöku
Lögreglan leitar eftir myndefni í tengslum við andlátið
Davíð Viðarsson var skyndihugdetta
Björninn sagður nálægt byggð