Veður hefur leikið við strandveiðisjómenn og fara því veiðar vel af stað. Á fyrstu tveim vikum strandveiðanna lönduðu strandveiðibátar 1.306 tonnum sem er 12,04% af þeim 11.100 tonnum sem veiðunum hefur verið ráðstafað, en alls hafa 557 bátar fengið úthlutað strandveiðileyfi.

„Það er einkennilegt að þurfa að hafa áhyggjur af því þegar vel fiskast,“ svarar Örn Pálsson, framkvæmdastjóri Landssambands smábátaeigenda (LS), spurður hvort hann hafi áhyggjur af því að veiðarnar nái ráðstöfuðu magni áður en strandveiðitímabilinu lýkur. „Til að tryggja sátt um strandveiðar verður að setja í lög að þær megi stunda í 48 daga án þess að hafa áhyggjur af því hvort veiðist 10 eða 15 þúsund tonn,“ segir hann.

Á strandveiðum má hver bátur landa að hámarki 650 kíló af slægðum afla í þorskígildum talið í hverri veiðiferð. Í annarri viku strandveiða voru 190 skip sem lönduðu 9.351 kílói umfram leyfilegt magn og var um 60% af umframaflanum landað á svæði A, en ágóði af sölu þeirra fiska rennur í ríkissjóð. Miðað við 297 króna meðalverð á fiskmörkuðum aðra viku veiðanna runnu tæpar 2,8 milljónir til ríkissjóðs.

Á fyrstu viku veiðanna mátti gera ráð fyrir að um 2,5 milljónir runnu til ríkissjóðs vegna umframafla, en þá nam hann 9,9 tonnum.

Frétt af mbl.is

Ríkissjóður fiskar á strandveiðum

Vilja færa milli róðra

„Í alltof mörgum tilfellum, því miður, hefur mönnum ekki tekist að passa upp á að afli fari ekki yfir leyfilegan skammt. Þó þessi afli myndi ekki tekjur hjá sjómönnum þá telst hann inni í heildarafla strandveiða og skerðir því hlut þeirra sem eru alltaf réttum megin,“ segir Örn um umframafla strandveiðibátanna. „Auðvitað er það ekki á færi nema snillinga að koma með að landi eftir daginn 774 kg af úrvalsþorski, þar sem tekst að veiða þá stærð sem mest eftirspurn er eftir.“

Aflalandað úr strandveiðibát. mbl.is/Eggert Jóhannesson

Þá segir framkvæmdastjórinn að LS hafi lagt áherslu á að strandveiðisjómönnum verði veitt aukið svigrúm og að heimilað verði að færa hluta af afla yfir á næsta róður. „Vel hefur verið tekið í þessa tillögu hjá Fiskistofu og er hún nú til skoðunar í sjávarútvegsráðuneytinu.“

„Annars reynir LS eftir fremsta megni að höfða til betri vitundar manna að hlíta þeim reglum sem gilda um veiðarnar. Passa upp á að veiða ekki umfram það sem leyfilegt er. Vissulega getur það verið erfitt í einstaka tilfellum, því menn vilja jú alltaf ná skammtinum og þrír vænir fiskar sem bíta á í lok róðurs leiða oft til umframafla. Að því leyti myndi pörunin koma til móts við menn,“ bætir Örn við að lokum.

Tengdar fréttir

Smábátaveiðar

Ráðgjöfin sögð æra óstöðugan

• Ánægður með nýja Sigrúnu Björk ÞH
• Lokun Skápsins tvímælalaust að skila sér
• „Leggjum línuna hvenær sem veður leyfir“
• Náðu 10 tonnum í mokveiði

» Fleiri tengdar fréttir