Opnað hefur verið fyrir umsóknir um strandveiðileyfi á vef Fiskistofu og verða alls 10.000 tonn af þorski í strandveiðipottinum, að því er fram kemur í tilkynningu frá matvælaráðuneytinu á vef stjórnarráðsins. Þar segir jafnframt matvælaráðherra að unnið sé að umbótum á strandveiðikerfinu í matvælaráðuneytinu.

Svandís Svavarsdóttir, matvælaráðherra, hefur undirritað reglugerð um strandveiðar ársins og verður heimildir sem veiðunum er ætlað 1.500 tonnum meiri en gert var ráð fyrir í kjölfar skerðinga. Þessar heimildir í þorski fengust á skiptamörkuðum fyrir heimildir ríkisins í öðrum tegundum og ákvað ráðherra að bæta í strandveiðipottinn. Hlutfall strandveiða af leyfilegum heildarafla þorsks nemur því 4,5% og hefur ekki hefur svo stórum hluta aflans áður verið úthlutað til strandveiða.

„Þessari ákvörðun er ætlað að festa strandveiðar enn betur í sessi, en í dag fá margar fjölskyldur hluta sinna heimilistekna frá strandveiðum. Sá afli sem er til ráðstöfunar fyrir strandveiðar hverju sinni miðast við ráðgjöf Hafrannsóknastofnunar og ákvörðun ráðherra um leyfilegan heildarafla,“ segir í tilkynningunni.

Svandís Svavarsdóttir matvælaráðherra mbl.is/Eggert Jóhannesson

Duga heimildirnar?

Fyrsti dagur strandveiða verður mánudaginn 2. maí. Fram kemur á vef Fiskistofu að umsókn þarf að hafa borist stofnuninni fyrir hálf tvö síðdegis á föstudag og greiðsluseðill greiddur fyrir níu að kvöldi sama dag ef stefnt er að því að hefja veiðar á fyrsta degi.

Áður hafa 200 mílur fjallað um að töluverður fjöldi er líklegur til að að sækja í strandveiðar í sumar í ljósi þess að margar smærri útgerðir eru langt komnar með að veiða þann afla sem þær hafa heimildir fyrir, auk þess sem eru verð hagstæð. Það getur því hæglega farið svo að 10 þúsund tonnin verði búin áður en strandveiðitímabilinu lýkur í ágúst.

Frétt af mbl.is

Stefnir í mikla þátttöku í strandveiðum í sumar

Kveðst hafa sett vinnu af stað

Strandveiðisumarið nú verður það fjórtánda frá því að veiðunum var komið á og er tilgangurinn að  sjá til þess að hægt sé að „stunda veiðar með ströndinni á sjálfbæran og ábyrgan hátt en jafnframt opna möguleika fyrir þau sem ekki hafa yfir aflamarki að ráða á að reyna fyrir sér í sjávarútvegi,“ segir í tilkynningu matvælaráðuneytisins.

„Ég hef fengið fjölda erinda frá strandveiðimönnum þar sem ég hef verið hvött til að taka til skoðunar hvernig bæta megi kerfið þannig að verðmætasköpun verði sem mest og jafnræði landsvæða sem best. Þessa hvatningu tek ég alvarlega og og hef ég sett slíka vinnu af stað. Mikilvægt er að strandveiðar verði áfram tryggðar í þágu byggða, sjálfbærni og fæðuöryggis,“ er haft eftir Svandísi í tilkynningunni.

Tengdar fréttir

Strandveiðar

Styttist í stöðvun strandveiða

• Álit SFS beri keim af hroka og yfirgangi
• „Ummæli sem dæma sig sjálf“
• Harma að látið sé undan græðgi strandveiðisjómanna
• Hafa landað rúmlega níu þúsund tonnum af þorski

» Fleiri tengdar fréttir

• Blogga um frétt