Mestu útflutningsverðmæti sjávarafurða í áratug

Útflutningsverðmæti sjávarafurða á fyrstu sex mánuðum ársins nam 170 milljörðum króna, sem er 18% aukning frá sama tímabili á síðasta ári í erlendri mynt. Þetta má lesa úr bráðabirgðatölum Hagstofu Íslands.

„Heilt yfir er því ágætis gangur í sjávarútvegi en af þeim vinnsluflokkum sem birtir eru í bráðabirgðatölunum er eingöngu samdráttur í heilfrystum fiski,“ segir í greiningu sem birt hefur verið á Radarnum.

Þar segir að hækkun afurðaverðs hafi haft sitt að segja um aukninguna, en vakin er athygli á að verðhækkanir hafi verið á flestum sviðum á þessu tímabili þar með talið á kostnaðarliðum sjávarútvegsfyrirtækja.

Mynd/Radarinn

10 milljarða meira vegna Noregs

Þegar skoðuð eru útflutningsverðmæti sjávarafurða til 10 stærstu viðskiptalandanna eftir tegundum fyrstu fimm mánuði ársins og í fyrra er áberandi aukning í útflutningi til Noregs.

„Það má rekja til loðnukvótans í ár og hversu stór hluti hans fór í bræðslu. Þessi aukning á útflutningi til Noregs ætti að koma fáum á óvart, enda hefur Noregur verið langstærsta viðskiptaland Íslendinga fyrir mjöl og lýsi í gegnum tíðina. Mjöl og lýsi sem fer til Noregs endar í fiskeldisfóðri, enda eru Norðmenn stórtækir í fiskeldi. Samkvæmt mánaðartölum Hagstofunnar, sem ná aftur til ársins 2002, hefur útflutningur til Noregs aldrei verið eins mikill á fyrstu fimm mánuðum ársins. Hvort sem litið er til verðmætis eða magns,“ segir í greiningu Radarsins.

Töluverð hækkun í júní

Í júnímánuði nam útflutningsverðmæti sjávarafurða rúmlega 29 milljörðum króna sem er um 8% meira en sama mánuð árið 2021, tæplega 12% meira í erlendri mynt vegna styrkingar krónunnar.

Greining Radarsins gerir ráð fyrir að stóran hluta af aukningunni megi rekja til loðnuafurða þar sem sést mikil aukning í þeim vinnsluflokkum þar sem hún er áberandi, en í bráðabirgðatölum Hagstofunnar er ekki birt verðmæti einstakra fisktegunda. Loðnuhrogn eru í vinnsluflokknum „aðrar sjávarafurðir“ og má sjá 70% aukningu í flokknum milli ára á föstu gengi.

Mynd/Radarinn

„Það má rekja til þess að hrognin eru aðeins seinna á ferðinni í útflutningstölum Hagstofunnar í ár en í fyrra. […] Í fyrra skiluðu þau sér að stórum hluta í apríl og maí, en núna virðist þunginn vera í maí og júní. Útflutningsverðmæti „annarra sjávarafurða“ er einmitt svipað á fyrri helmingi ársins og í fyrra, eins og sést á myndinni hér fyrir neðan. Jafnframt er áfram mikil aukning í útflutningi á fiskimjöli og lýsi í júní. Verðmæti þess samanlagt á fyrri árshelmingi er þrefalt meira á föstu gengi en á sama tíma í fyrra. Það má rekja til þess að loðnukvótinn í ár var margfalt stærri en í fyrra og því fór hlutfallslega meira af kvótanum í bræðslu,“ segir í greiningunni.

• Blogga um frétt