Forsendur brostnar
Setja bókamerki
Samkeppniseftirlitið lítur svo á að forsendur séu brostnar fyrir samningi Samkeppniseftirlitsins við matvælaráðuneytið og mun óska eftir viðræðum við ráðuneytið um lok hans.
Þetta segir í tilkynningu frá Samkeppniseftirlitinu sem birt er á vef þess í dag en fram kom í gær að áfrýjunarnefnd samkeppnismála hefði komist að þeirri niðurstöðu að dagsektir Samkeppniseftirlitsins á sjávarútvegsfyrirtækið Brim hf. væru ólöglegar og hefur fellt niður niður dagsektirnar.
Mun óska upplýsinga að nýju
Fram kemur í tilkynningu Samkeppniseftirlitsins;
„Eins og rakið hefur verið opinberlega og fram kom í sjónarmiðum Samkeppniseftirlitsins fyrir áfrýjunarnefnd tók Samkeppniseftirlitið sjálfstæða ákvörðun um að hefja athugun á stjórnunar- og eignatengslum í sjávarútvegi, í samræmi við skýrar heimildir og hlutverk eftirlitsins. Þannig hefur Samkeppniseftirlitið það hlutverk að kanna stjórnunar- og eignatengsl í íslensku atvinnulífi og skrifa um það skýrslur, sbr. d-lið 1. mgr. 8. gr. samkeppnislaga nr. 44/2005. Hefur Samkeppniseftirlitið í ýmsum fyrri úrlausnum, sem og opinberlega birtum áherslum, bent á mikilvægi slíkrar athugunar.
Með hliðsjón af framangreindu og í ljósi úrskurðar áfrýjunarnefndar hefur Samkeppniseftirlitið í hyggju að hefja nýja athugun á stjórnunar- og eignatengslum sjávarútvegsfyrirtækja. Jafnframt mun Samkeppniseftirlitið óska að nýju upplýsinga frá sjávarútvegsfyrirtækjum, en með því gefst hlutaðeigandi fyrirtækjum færi á að endurnýja og e.a. bæta við fyrri svör.“
Tilkynningu Samkeppniseftirlitsins má sjá hér.
