Katrín prinsessa og Vilhjálmur krónprins Bretlands settu upp sín breiðustu bros á Royal Variety hátíðinni í London á dögunum. Þar voru þau ásamt Viktoríu krónprinsessu Svíþjóðar og Daníel eiginmanni hennar.

Það vakti mikla athygli breskra fjölmiðla að Katrín og Vilhjálmur héldust í hendur en þau gera það sárasjaldan. 

Katrín klæddist sægrænum síðkjól frá merkinu Safiyaa sem er einmitt í miklu uppáhaldi hjá Meghan hertogynju. Kjóllinn kostar um 230 þúsund íslenskar krónur og er með skrautsteinum um hálsinn og síðum skikkjuermum.

Viktoría krónprinsessa var hins vegar í svörtum fjaðrakjól frá sænska merkinu Toteme.

Styr hefur staðið um konungsfjölskylduna í kjölfar útgáfu bókarinnar Endgame eftir Omid Scobie en í sumum útgáfum bókarinnar hafa þeir einstaklingar verið nafngreindir sem voru að velta fyrir sér húðlit Archie, sonar Harry og Meghan. Eiga það að hafa verið Karl kóngur og Katrín prinsessa. Þetta fjölmiðlafár virðist ekki hafa mikil áhrif á Katrínu.

Katrín prinsessa þótti einstaklega glæsileg í sægrænum síðkjól með skikkjuermum. AFP

Kjóllinn er úr smiðju Safiyaa. AFP

Viktoría krónprinsessa og Daníel voru í opinberri heimsókn og voru viðstödd hátíðina ásamt Katrínu og Vilhjálmi. AFP

Viktoría var glæsileg í svörtum síðkjól. AFP

Gaman hjá kóngafólkinu. AFP