Nöfn tveggja grunaðra tilræðismanna birt í Lundúnum

Lögregla í Lundúnum birti í dag nöfn tveggja grunaðra tilræðismanna í sprengjutilræðunum í borginni þann 21. júlí og nýjar myndir af þeim. Þá staðfesti lögregla í dag að fimmta sprengjan hefði fundist í almenningsgarði í borginni um helgina og að hún hafi verið sömu gerðar og sprengjurnar sem fundust í síðustu viku. Tveir menn voru handteknir í Lundúnum í dag í tengslum við rannsókn á sprengjutilræðunum.

Mennirnir, sem hafa verið nafngreindir, heita Muktar Said Ibraihim, einnig þekktur undir nafninu Muktar Mohammed Said, og Yasin Hassan Omar. Þeir eru 27 og 24 ára gamlir. Ibraihim er talinn hafa komið fyrir sprengju í strætisvagni númer 26 og Omar er talinn hafa reynt að sprengja sprengju í lest nálægt brautarstöðinni við Warren Street.

Lögregla telur, að tilræðismennirnir kunni að vera að undirbúa aðra árás í höfuðborginni. Tveir menn voru handteknir í Lundúnum í dag í tengslum við rannsókn á sprengjutilræðunum. Lögreglan vildi ekki upplýsa undir hvaða kringumstæðum mennirnir hefðu verið handteknir.