Bandaríkjaher óttast að leita þurfi nýrra leiða til birgðaflutninga

Pólitískt umrót hefur til þessa ekki haft áhrif á birgðaflutninga …
Pólitískt umrót hefur til þessa ekki haft áhrif á birgðaflutninga Bandaríkjahers í Pakistan. Reuters

Bandaríski herinn undirbýr sig nú undir að finna nýjar leiðir til að ferja vistir, eldsneyti og mannskap til Afganistan. Talsmaður bandaríska hermálaráðuneytisins í Pentagon sagði að ef óróleikinn í Pakistan muni aukast þurfi að grípa til annarra ráðstafana en fram að þessu hefur pólitískur óróleiki í landinu ekki haft áhrif á birgðaflutninga um landið.

Geoff Morrell, talsmaður Pentagon sagðist ekki hafa áhyggjur af kjarnorkuvopnaforðanum í Pakistan. „Við teljum að þau séu undir góðri stjórn,” sagði hann á blaðamannafundi í dag.

Menn hafa hins vegar áhyggjur af birgðaflutningunum til Afganistan því um 75% þeirra er flogið til Pakistans.

Morell gaf ekki upp hvaða aðrar leiðir kæmu til greina en næsti flugvöllur undir stjórn Bandaríkjahers er herflugvöllur í Kyrgystan.

mbl.is

Bloggað um fréttina