Keppast um Evrópustofnanir eftir Brexit

Umsóknarfrestur um að hýsa til frambúðar Evrópustofnanir sem eru staðsettar í Bretlandi rennur út í dag. Um er að ræða evrópsku bankaeftirlitstofnunina (EBA) og og Lyfjastofnun Evrópu (EMA) en báðar eru þær til húsa í Lundúnum. 

Í ljósi fyrirhugaðrar útgöngu Bretlands úr Evrópusambandinu hefur verið ráðgert að flytja stofnanirnar á vegum sambandsins frá Bretlandi til annarra sambandslanda. Gefinn verður út listi á morgun yfir mögulegar staðsetningar en lokaákvörðun verður tekin í nóvember. Lagt er upp með að nýju höfuðstöðvarnar verði teknar í notkun eftir 2019. 

Hjá EMA starfa 900 manns en Evrópuborgirnar sem hafa sótt um að hýsa hana eru Amsterdam, Kaupmannahöfn, Helsinki, Lille, Stokkhólmur Barselóna. Töluvert færri starfa hjá EBA, um 190 manns, og er talið hún verði færð til Frankfurt. Aðrir umsækjendur um EBA eru Lúxemborg, París og Prag. Þá hafa Vín, Dyflinn og Varsjá einnig sótt um að hýsa báðar stofnanir. 

EMA hefur hefur verið staðsett í Lundúnum frá árinu 1995 en EBA frá 2011. Valið grundvallast á stigagjöf sem tekur meðal annars með í reikninginn aðgengi fyrir núverandi starfsmenn, atvinnutækifæri fyrir maka þeirra og skólagöngu barnanna. Einnig verður horft til þess hvort að aðrir stofnanir séu til staðar svo að ekki komist á einokunarstaða.

Hvert sambandsland hefur sex atkvæði; þrjú fyrir fyrsta val, tvö fyrir annað val og eitt fyrir síðasta. Í október verður umræða um málið og síðan leynileg atkvæðisgreiðsla í nóvember. 

• 1 blogg um fréttina

Bloggað um fréttina

• Ásgrímur Hartmannsson: Brexit bara hedur áfram að bæta hag Breta