Frans páfi féllst í dag á afsögn Philip Wilson, ástralsks erkibiskups sem sakfelldur var fyrir að halda barnaníði innan kirkjunnar leyndu á áttunda áratug síðustu aldar.
Ástralskur dómstóll dæmdi Wilson í tólf mánaða fangelsi í maí á þessu ári, en Wilson, sem þá gegndi embætti erkibiskups í Adelaide, var þá sá hæst setti innan kaþólsku kirkjunnar sem dæmdur hafði verið fyrir slíkan glæp.
Greint var frá því á laugardag að páfi hefði samþykkt afsögn kardínálans Theodore McCarrick, fyrrverandi erkibiskups Washington í Bandaríkjunum. McCarrick var í sumar sakaður um að hafa misnotað ungling kynferðislega fyrir tæpum 50 árum.
McCarrick var enn fremur leystur undan öllum opinberum skyldustörfum þar til mál hans fer fyrir kirkjurétt.