Segir Frans páfa hafa vitað af kynferðislegri misnotkun

Frans páfi vissi af ásökunum um kynferðisbrot fyrrverandi erkibiskupsins og kardínálans Theodore McCarrick í mörg ár áður en greint var frá þeim opinberlega. Þetta fullyrðir erkibiskupinn Carlo Maria Viganò í ítarlegu bréfi sem var birt fyrr í dag. New York Times greinir frá.

Frétt af mbl.is

Páfi biður um fyrirgefningu

Á sama tíma og bréfið var birt var Frans páfi í opinberri heimsókn í Írlandi þar sem hann bað guð um fyrirgefningu vegna aðkomu kaþólsku kirkjunnar að fjölda kynferðisbrotamála sem hafa komið upp þar í landi.

Vatíkanið hefur ekki tjáð sig um ásakanirnar enn sem komið er.

Frétt af mbl.is

Páfinn styður fórnarlömbin

Yfirhylming valdamikilla manna

Erkibiskupinn Carlo Maria Viganò fullyrðir að hópur valdamikilla manna í Vatíkaninu hafi tekið þátt í að hylma yfir ásakanir um kynferðislega misnotkun af hálfu McCarrick.

McCarrick var einn af æðstu emb­ætt­is­mönn­um kaþólsku kirkj­unn­ar í Banda­ríkj­un­um áður en Frans páfi samþykkti uppsögn hans fyrir um sléttum mánuði.

Frétt af mbl.is

Páfi fellst á afsögn McCarricks

Uppsögnin kom í kjölfar þess að McCarrick var sakaður um að hafa beitt táning kynferðislegu ofbeldi er hann starfaði sem prestur í New York snemma á áttunda áratugnum.

Vissi að McCarrick væri „raðnauðgari“

Viganò segir að forveri Frans, Benedikt 16., hafi vitað af misnotkun McCarrick og refsað honum fyrir hana m.a. með því að banna honum að búa í prestskóla og að halda messur. Þá hafi Benedikt páfi sagt Frans frá því í júní árið 2013.

„Hann vissi það alla vega frá 23. júní 2013 að McCarrick væri raðnauðgari. Á þessum gríðarlega mikilvæga tímapunkti verður hann [Frans páfi] að viðurkenna mistök sín og að vera fyrstur til að setja gott fordæmi fyrir þá kardínála og biskupa sem hylmdu yfir kynferðisbrot McCarrick með því að segja af sér,“ skrifar Viganò meðal annars.

Fyrrverandi kardínálinn Theodore McCarrick. AFP

Í bréfinu, sem telur um 7.000 orð, gagnrýnir Viganò einnig kardínála sem aðhyllast hættulega „samkynhneigða stefnu“ innan Vatíkansins. Viganò kennir samkynhneigðum um hnignun kaþólsku kirkjunnar í mörgum löndum.

Brögð í valdatafli

Sum fórnarlömb kynferðisbrota af hálfu presta og annarra innan kaþólsku kirkjunnar hafa gagnrýnt Viganò fyrir birtingu bréfsins og segja ásakanirnar sem þar koma fram vera hluta af valdatafli innan kirkjunnar.

• Blogga um frétt