22 létust í bílslysi nærri Izmir í Tyrklandi í dag. Á meðal látinna voru nokkur börn. Fólkið er talið hafa verið á leiðinni til Grikklands, en hópurinn samanstóð af farand- og flóttafólki. Þrettán til viðbótar slösuðust.
Þjóðerni fólksins liggur ekki fyrir, en á meðal látinna voru tvö ungbörn, tvö börn og ólétt kona.
Rútan sem þau voru í fór út af veginum og hrapaði úr talsverðri hæð niður í manngerðan skurð. Höggið var þungt og rútan lenti á þakinu, eins og sjá má á meðfylgjandi myndum.
Bílstjórinn var Tyrki á fertugsaldri. Hann var einn þeirra sem lifðu af slysið. Hann sagði lögreglumönnum að hann hefði þurft að sveigja frá, þar sem annar bíll hefði stefnt framan á rútuna. Maðurinn hafði ekki tilskilin réttindi til að aka ökutæki af þessari stærð og verður sennilega handtekinn þegar hann kemur af spítala.
Rútan hafði verið á leigu í fjóra daga. Í farangursrými hennar fundust nokkrir upplásanlegir björgunarbátar, sem talið er benda til þess að fólkið hafi ætlað sér að fara sjóleiðina til Grikklands.