„Á barmi mjög hættulegrar stöðu“
Setja bókamerki
Óeirðalögregla hefur tekist á við mótmælendur í Hong Kong í dag, þriðja daginn í röð. Þar er nú skollið á allsherjarverkfall, sem hefur svo gott sem lamað samgöngur í borginni og flugsamgöngur einnig. Ofbeldið færist í aukana.
Carrie Lam ríkisstjóri varar mótmælendur við og segir að hún muni ekki láta undan kröfum þeirra. Hún segir mótmælendur grafa undan lögum og reglu og varaði við því að nú væri Hong Kong „á barmi mjög hættulegrar stöðu“.
Hún sagði framferði mótmælenda í borginni vega að „eins ríkis, tveggja kerfa“ skipulaginu, sem hefur verið við lýði í Hong Kong frá því Kínverjar tóku við borginni úr höndum Breta árið 1997.
„Ég leyfi mér að segja að þeir séu að reyna að eyðileggja Hong Kong,“ sagði Lam um mótmælendur.
Miklar samgöngutruflanir
Mótmælendur byrjuðu daginn á því að trufla neðanjarðarlestarkerfið. Fjöldi fólks þusti inn á stöðvarnar og hélt dyrum lesta opnum til þess að koma í veg fyrir að þær kæmust af stað. Olli þetta nær algjörri lömun á kerfinu, sem milljónir nýta sér til að komast leiðar sinnar á hverjum degi.
Mótmælagöngur voru haldnar á sjö mismunandi stöðum í borginni síðdegis. Það þýðir að lögregla þurfti að dreifa liði sínu víða til þess að fylgjast með. Á tveimur stöðum beittu lögreglumenn táragasi gegn mótmælendum.
Verkföll sem þessi eru afar fátíð í Hong Kong. Verkalýðsfélög hafa þar lítil áhrif. En í dag ríkti öngþveiti, meðal annars á flugvelli borgarinnar, þar sem þurfti að aflýsa yfir 160 flugferðum síðdegis. Flugvöllurinn er einn sá fjölfarnasti í heimi.
Sjá má í myndskeiðinu hér að neðan frá South China Morning Post hvernig verkfallsaðgerðir og truflanir mótmælenda hafa haft áhrif á daginn.
Flugfélagið Cathay Pacific þurfi að aflýsa mörgum flugferðum sínum. Félagið gaf ekki út neina ástæðu en samkvæmt frétt AFP hefur stéttarfélag flugfreyja og -þjóna hjá félaginu staðfest að hluti starfsmanna félagsins hafi farið í verkfall.
„Síðustu 50 daga hefur ríkisstjórnin verið að hundsa kröfur fólksins og notað lögregluvald til þess að reyna að kveða niður raddir þess, sem veldur því að ótalmargir Hong Kong-búar örvænta,“ sagði í yfirlýsingu stéttarfélagsins.
Spenna í lofti
Mótmælendur lokuðu einnig vegum. Olli það nokkurri spennu á milli mótmælenda og þeirra sem nauðsynlega þurftu að komast leiðar sinnar. Í frétt AFP segir að myndskeið sé að finna á netinu af ökumanni keyra í gegnum vegatálma mótmælenda í úthverfi borgarinnar.
Hér að neðan má sjá borgaralega óhlýðni mótmælenda, sem keyra stanslaust í hringi á hringtorgi í borginni til þess að trufla umferð.
Kíghósti á töluverðri dreifingu í samfélaginu
Fyrsta 360 gráða yfirlitsmyndin frá goslokum
Tók barn upp úr innkaupakerru móður
Hvernig er vitað að þessi kona átti þetta barn?
Tólf ára drengur illa fótbrotinn
Magnús Tumi: Gýs líklega á næstu dögum
Goslok hafa ekki áhrif á vinnuna
