Til átaka kom milli mótmælenda og lögreglunnar fyrir utan verslunarmiðstöð í Hong Kong í dag. Til stóð að trufla starfsemina á alþjóðaflugvellinum en mótmælendur höfðu ekki erindi sem erfiði. Nokkrir veifuðu kínverska fánanum og fjölmenntu á lestarstöðvar.
Lögreglan skaut gúmmíkúlum og beitti táragasi á mótmælendur í norðurhluta borgarinnar Sha Tin seinnipartinn í dag. Fyrr um daginn höfðu mótmælin farið friðsamlega fram þar sem fólk söng og föndraði origami-trönur í verslunarmiðstöðinni áður en átök brutust út.
Lögreglan herti eftirlit á flugvellinum og yfirvöld fyrirskipuðu að ferðum lesta og hópferðabíla að flugvellinum yrði fækkað til að koma í veg fyrir að mótmælendum tækist ætlunarverk sitt. Mótmælendur hafa iðulega flykkst á flugvöllinn, sem er sá áttundi strærsti í heimi, til að vekja athygli á málstað sínum.
Þetta er 16. helgin í röð sem mótmælt er í Hong Kong.
Upphaf mótmælanna má rekja til lagafrumvarps sem heimila átti framsal meintra brotamanna til meginlands Kína en þau þróuðust síðan upp í ákall um auknar lýðræðisumbætur og að kínversk stjórnvöld létu borgina afskiptalausa. 1.300 hafa verið handteknir frá því að mótmælin hófust.