Virkni bóluefnis bandaríska líftæknifyrirtækisins Novavax er rúmlega 90%, þar með talið gegn nýjum afbrigðum kórónuveirunnar.
Fyrirtækið greindi frá þessu og vísaði í umfangsmikla rannsókn sem var gerð í Bandaríkjunum og Mexíkó.
Bóluefnið „veitti 100% vernd gegn miðlungs og alvarlegum sjúkdómseinkennum, 90,4% á heildina litið“, sagði í yfirlýsingu fyrirtækisins.
Fram kom að 29.960 manns hefðu tekið þátt í rannsókninni á 119 stöðum í Bandaríkjunum og Mexíkó.
Í janúar var greint frá samskonar niðurstöðum hjá Novavax en þá var virknin ekki eins mikil gegn nýjum afbrigðum.