Joe Biden Bandaríkjaforseti hefur heitið því að lokað verði fyrir jarðgasleiðslu Rússa sem liggur til Þýskalands ráðist þeir inn í Úkraínu.
BBC greinir frá.
Þetta kom fram í máli forsetans þar sem hann ræddi Olaf Scholz kanslara Þýskalands í Washington höfuðborg Bandaríkjanna í gær. Biden gaf ekki upp hvernig hann hugðist framkvæma þessa áætlun þegar hann var spurður af blaðamönnum að loknum fundi þjóðarleiðtoganna tveggja. Hann var þó staðráðinn í að þetta yrði gert.
„Ég lofa því, við munum koma þessu í verk,“ sagði forsetinn.
Kanslarinn var þó ekki jafn skýr í svörum þegar kom að þessu máli. Hann gat þó staðfest að Bandaríkin og Þýskaland væru á sama máli þegar kæmi að refsiaðgerðum gagnvart Rússlandi ef það kæmi til innrásar í Úkraínu.
Ríflega 100 þúsund rússneskir hermenn eru nú við landamæri Úkraínu og telja bandarísk yfirvöld að Rússar hafi tekist að safna saman um 70% þess herliðs sem þurfi til þess að hefja innrás.
Vaxandi ótti er vegna yfirvofandi innrásar í Úkraínu og hafa Bandaríkin og fleiri Vesturlönd hótað refsiaðgerðum gegn Rússum sem hafa þó neitað öllum sökum. Hefur Vladimír Pútín þá meðal annars sakað Bandaríkjamenn um afskiptasemi.
Gasleiðslan sem um ræðir ber heitið Nord Stream 2 og tók fimm ár að byggja. Nam kostnaður verksins um 11 milljörðum dala, eða um 1.379 milljarða króna.
Leiðslan hefur þó ekki enn verið tekin í notkun þar sem að hún er ekki í samræmi við þýsk lög og bíður hún nú samþykkis.
Stór evrópsk fyrirtæki hafa tekið þátt í að fjármagna verkið, sem á að tvöfalda gasútflutning Rússlands til Þýskalands. Aðrir hafa þó mótmælt gasleiðslunni, meðal annars vegna loftslagssjónarmiða.