Smartland Mörtu Maríu | Frægð | mbl | 24.3.2019 | 11:49 | Uppfært 12:58

„Ég er ungfrú Ísland þú átt ekki séns“

Hvítvínskonan og Alexandra Helga Ívarsdóttir eins klæddar.

Alexandra Helga Ívarsdóttir, unnusta Gylfa Þórs Sigurðssonar, var gæsuð af fullum krafti í gær. Parið ætlar að ganga í heilagt hjónaband á Ítalíu í sumar.

Árið 2008 varð Alexandra ungfrú Ísland og keppti í framhaldinu í Miss World. Meðan á þessu ævintýri stóð bloggaði hún á blog.is. Að sjálfsögðu var þessi ferill rifjaður upp á gæsadaginn þar sem hún var klædd upp í fegurðardrottningarkjól og látin kaupa í matinn með borðann og allt. Vakti þetta kátínu meðal gesta.

Frétt af mbl.is

Gylfi og Alexandra undirbúa brúðkaupið á Ítalíu

Hér er Alexandra Helga árið 2008. Þá var hún 18 ára nemi úr Grafarvogi sem sigraði í keppninni Ungfrú Ísland en Ingibjörg Ragnheiður Egilsdóttir, 23 ára Austfirðingur, varð í öðru sæti og Sonja Björk Jónsdóttir, 18 ára úr Svarfaðardal, í þriðja sæti. mbl.is// Haraldur Guðjónsson

En það var ekki það eina sem hún gerði því hún fór í hljóðver og söng lag með Rottweiler-hundunum og voru vinkonur hennar búnar að búa til nýjan texta. Ein línan í textanum var eftirfarandi:

„Ég er ungfrú Ísland þú átt ekki séns.“

Svo var farið á í brunch á Bryggjuna brugghús, í danskennslu í Kramhúsið og svo var slegið upp teiti í miðbæ Reykjavíkur þar sem Hvítvínskonan sem leikin er af Hjálmari Erni fór á kostum. Á tímabili voru Alexandra og Hvítvínskonan eins klæddar.

Svo kom Erpur Eyvindarson og tryllti mannskapinn og að lokum var karlpeningnum hleypt inn en þá var Alexandra búin að syngja með Erpi og skemmta sér konunglega eins og sást víða á Instagram í gærkvöldi og í nótt.