Knattspyrnusamband Íslands hefur hafið birtingu myndbanda á samfélagsmiðlum sínum þar sem um er að ræða æfingar sem krakkar geta framkvæmt einir og sér eða í litlum hópum, og hvatningarmyndbönd þar sem landsliðsfólk hvetur iðkendur til að halda áfram að hreyfa sig og æfa reglulega.
Verkefnið er kallað „Áfram Ísland“ og myndböndin munu birtast daglega á Instagram- og Facebook-síðum KSÍ en þau verður einnig að finna á Youtube-síðu sambandsins. Rangæingurinn Dagný Brynjarsdóttir, leikmaður Selfoss í úrvalsdeild kvenna og fyrrverandi atvinnumaður, fór yfir nokkrar einfaldar knattraksæfingar í dag sem allir ættu að hafa gagn og gaman af.
Dagný á að baki farsælan feril með Bayern München í Þýskalandi og Portland Thorns í bandarísku atvinnumannadeildinni. Hún gekk í Florida State-háskólann í Bandaríkjunum þar sem hún sló fyrst í gegn en hún á að baki 85 A-landsleiki fyrir Ísland þar sem hún hefur skorað 25 mörk.
Við hjá Árvakri viljum vekja athygli á því sem vel er gert á þessum erfiðu tímum. Ef þú ert með góða sögu af fyrirtækjum og einstaklingum sem eru að gera gott, sendu okkur ábendingu á netfangið stondumsaman@mbl.is.