Þórsarar jöfnuðu á síðustu stundu

Þór og Afturelding skildu jöfn, 1:1, er liðin mættust í Lengjudeild karla í fótbolta í dag á Þórsvelli á Akureyri. Skoruðu bæði lið mark úr vítaspyrnu á síðustu tíu mínútunum. 

Afturelding fékk gott tækifæri til að komast yfir á 18. mínútu en Spánverjinn Alejandro Zambrano nýtti ekki vítaspyrnu og var staðan í hálfleik markalaus. 

Þannig var hún allt fram á 81. mínútu þegar Jason Daði Svanþórsson kom Aftureldingu yfir úr vítaspyrnu. Virtist það ætla að nægja Aftureldingu til sigurs þangað til Þór fékk vítaspyrnu á lokamínútunni. Álvaro Montejo fór á punktinn og tryggði Þór eitt stig. 

Þór er í sjötta sæti með 28 stig og Afturelding í áttunda sæti með 22 stig. 

• Blogga um frétt