Daniel Ricciardo segist hafa beðið eftir sigri í formúlu-1 til að fá tækifæri til að tileinka hann franska ökumanninum Jules Bianchi.

Rösk tvö áru eru frá því Ricciardo fagnaði mótssigri en seint á vertíðinni 2014 slasaðist Bianchi lífshættulega í japanska kappakstrinum í Suzuka. Kom hann aldrei til meðvitundar og lést níu mánuðum seinna af völdum áverka sinna í júlí 2015.

Sigur Ricciardo í Sepang var sá fjórði á ferli hans en fyrsta sigur sinn vann ástralski ökumaðurinn í belgíska kappakstrinum 2014. 

Þeir Bianchi voru góðir persónulegir vinir. „Ég vil tileinka Jules þennan sigur. Ég hef beðið eftir að vinna mót til að geta helgað honum sigurinn. Líf mitt tók stakkaskiptum eftir slysið og ég er einstaklega þakklátur fyrir það sem ég hef og nýt,“ sagði Ricciardo.