Svíinn geðþekki Zlatan Ibrahimovic er byrjaður að æfa með sænska úrvalsdeildarfélaginu Hammarby en hann á sjálfur fjórðungshlut í félaginu.
Zlatan er einn þekktasti knattspyrnumaður heims en hann yfirgaf AC Milan í Ítalíu á dögunum eftir að hafa samið við félagið í byrjun árs. Ástandið á Ítalíu er slæmt vegna kórónuveirunnar og var öllum íþróttaviðburðum í landinu aflýst en Serie A, efstu deildinni í knattspyrnu, hefur verið frestað ótímabundið.
Hann hefur verið heima með fjölskyldu sinni í Stokkhólmi síðan en undanfarna viku hafa nokkrir leikmenn byrjað að æfa og hefur Svíinn geðþekki tekið þátt í því.
Zlatan er uppalinn í Malmö og var í guðatölu meðal stuðningsmanna liðsins lengi. Stytta af kappanum var vígð við mikinn fögnuð þegar allt lék í lyndi en hann keypti hluta í Hammarby frá Stokkhólmi í nóvember á síðasta ári. Sú ákvörðun vakti mikla reiði stuðningsmanna uppeldisfélagsins sem ítrekað frömdu skemmdarverk á styttunni þangað til að hún var endanlega fjarlægð í janúar.
Hammarby hefur einu sinni orðið sænskur meistari, árið 2001. Liðið vann sænsku 1. deildina árið 2014. Liðið endaði í 3. sæti úrvalsdeildarinnar í ár, aðeins einu stigi á eftir meisturum Djurgården.