Thiago Silva, varnarmaður enska knattspyrnufélagsins Chelsea, verður ekki með liðinu í kvöld þegar það mætir Krasnodar í Meistaradeild Evrópu í Rússlandi.
Silva, sem er 36 ára gamall, gekk til liðs við Chelsea á frjálsri sölu í sumar en hann lék með PSG í Frakklandi í átta ár áður en hann skrifaði undir eins árs samning við Chelsea.
Krasnodar verður án átta lykilmanna í leiknum en kórónuveiran hefur herjað á leikmenn rússneska liðsins sem og meiðsli.
Silva var að jafna sig á meiðslum í upphafi tímabils en hann hefur byrjað síðustu leiki Chelsea og hjálpað því að halda marki sínu í hreinu í síðustu tveimur viðureignum.
Miðvörðurinn fær hins vegar hvíld í kvöld fyrir leikjatörnina fram undan en vegna kórónuveirufaraldursins er leikið ansi þétt í Evrópu um þessar mundir.