„Það er þvílíkur heiður að vera orðuð við Bayern München og ef þetta gengur eftir er það mjög spennandi,“ sagði Karólína Lea Vilhjálmsdóttir landsliðskona í fótbolta í samtali við mbl.is. Þýska stórliðið Bayern München er í viðræðum við Breiðablik um kaup á Karólínu, sem er aðeins 19 ára.
Karólína er sem stendur að jafna sig á meiðslum, sem gætu haldið henni frá keppni næstu þrjá mánuðina. „Ég er núna að jafna mig á meiðslum þar sem ég reif liðþófa. Það er enn meiri heiður að félagið vill fá mig þótt ég sé meidd. Ég stefni á að byrja að hlaupa í janúar og svo verð ég örugglega orðin alveg klár í mars,“ sagði Karólína.
Hún hefur heyrt af áhuga annarra félaga, en viðurkennir að Bayern München sé afar spennandi kostur. „Það hafa verið einhver lið á Norðurlöndunum en ekkert þeirra er eins spennandi og Bayern München,“ sagði hún.
Sveindís Jane Jónsdóttir, liðsfélagi Karólínu hjá landsliðinu og Breiðabliki á síðustu leiktíð, gekk í gær í raðir Wolfsburg í Þýskalandi en hún verður lánuð til Kristianstad í Svíþjóð í eitt tímabil áður en hún fer til Þýskalands. Karólína útilokar ekki að hún fari einnig á lán fyrst um sinn. „Við skulum bíða og sjá, það er ekkert í höfn enn þá. Ef þetta gengur eftir fer þetta eftir því hvað félagið vill,“ sagði Karólína Lea.