Jamaíska knattspyrnusambandið hefur þegar fengið 277 milljónir íslenskra króna vegna árangurs Heimis Hallgrímsson, þjálfara karlalandsliðs þjóðarinnar.
ESPN greinir frá. Ástæðan er sú að landsliðið tryggði sér inn á lokakeppni Ameríkubikarsins, Copa America, sem fram fer í Bandaríkjunum 20. júni til 14. júlí.
Jamaíka tryggði sér sætið með því að komast í úrslitaleik Þjóðadeildar Norður-Ameríku þar sem liðið mátti þola svekkjandi tap fyrir Bandaríkjunum.
Verðlaunafé í Ameríkubikarnum hefur aldrei verið hærra. Allar þjóðir fá tvær milljónir fyrir þátttöku á mótinu.
Jamaíka er í riðli með Mexíkó, Ekvador og Venesúela en komist liðið í undanúrslitin fær sambandið auka 554 milljónir króna.
Tvö efstu lið hvers riðils fara í 8-liða úrslit en 16 lið taka þátt á mótinu.