Anton Sveinn McKee setti sitt sjötta Íslandsmet á þremur dögum rétt í þessu og er kominn í undanúrslitin í 100 metra bringusundi á Evrópumeistaramótinu í 25 metra laug í Glasgow.
Anton synti vegalengdina á 57,21 sekúndu og varð annar í fjórða riðli af fimm, rétt á eftir Evrópumeistaranum Arno Kamminga frá Hollandi sem synti á 56,71 sekúndu. Enginn í síðasta riðlinum náði betri tíma en þeir og Anton stóð því uppi með næstbesta tímann í undanrásunum í greininni.
Fyrra Íslandsmet Antons sem hann setti á HM í Hangzhou í desember 2018 var 57,57 sekúndur. Hann hefur stungið sér sex sinnum til sunds á EM og sett Íslandsmet í öll skiptin en hann varð fjórði í 200 m bringusundi í gær og sjöundi í 50 m bringusundi á miðvikudaginn.
Undanúrslitin fara fram klukkan 17.15 í dag en úrslitasundið er hins vegar síðdegis á morgun, laugardag.